ಕಲಬುರಗಿಯಲ್ಲಿ ಕ್ರೌರ್ಯ: ಸ್ನೇಹಿತರೇ ಯುವಕನನ್ನು ಕಲ್ಲಿನಿಂದ ಹೊಡೆದು ಬರ್ಬರ ಹತ್ಯೆ

ಕರೆ ಮಾಡಿ “ಬೇಗ ಬರ್ತೀನಿ” ಎಂದ, ಬೆಳಗಿನ ಜಾವ ಶವವಾಗಿ ಪತ್ತೆ

ಮೃತ ಯುವಕ ಹಿಂದಿನ ಶನಿವಾರ  ದಿನ ಸಂಜೆಯಷ್ಟರ ಹೊತ್ತಿಗೆ ಮನೆಯಿಂದ ಸ್ನೇಹಿತರೊಂದಿಗೆ ಹೊರಟಿದ್ದ. ತಡರಾತ್ರಿ ಹತ್ತೂ ಗಂಟೆಗೆ ತಂದೆ ಕರೆ ಮಾಡಿದಾಗ, “ಸ್ನೇಹಿತರ ಜೊತೆ ಇದ್ದೇನೆ, ಬೇಗ ಬರುತ್ತೇನೆ” ಎಂದು ಆತ ಭರವಸೆ ನೀಡಿದ್ದ. ಆದರೆ ಬೆಳಗಿನ ಜಾವ ಹೆತ್ತವರು ಮನೆಯಿಂದ ಸುಮಾರು 50 ಅಡಿ ದೂರದಲ್ಲಿ ತಮ್ಮ ಮಗನ ಶವ ಕಂಡು ಕಂಗಾಲಾಗಿದ್ದರು.

ಬರ್ಬರ ಕೊಲೆ: ತಲೆ ಮೇಲೆ 12 ಬಾರಿ ಕಲ್ಲು ಎತ್ತಿಹಾಕಿದ ನೃಶಂಸರು

ಘಟನೆಯಲ್ಲಿ ಆತನ ಸ್ನೇಹಿತರೇ ನಿರ್ದಯವಾಗಿ ಹತ್ಯೆ ಮಾಡಿರುವುದಾಗಿ ಪೊಲೀಸರು ಶಂಕಿಸಿದ್ದಾರೆ. ಒಂದಲ್ಲ, ಎರಡು ಅಲ್ಲ, ಬರೊಬ್ಬರಿ 12 ಬಾರಿ ಕಲ್ಲು ಎತ್ತಿ ಹಾಕಿ ಹತ್ಯೆ ಮಾಡಿರುವುದು ಸಿಸಿಟಿವಿ ದೃಶ್ಯಗಳಲ್ಲಿ ಸೆರೆಯಾಗಿದೆ. ಹತ್ಯೆಗೊಳಗಾದ ಯುವಕನ ಗೆಳೆಯರೇ ಈ ಕೃತ್ಯ ಎಸಗಿರುವ ಶಂಕೆ ತೀವ್ರವಾಗಿದೆ.

ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದ ಪರಿಸ್ಥಿತಿ

ಪೊಲೀಸರು ಬೆಳಗ್ಗೆ ಘಟನಾ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ ನಂತರ ಶವವನ್ನು ಮರಣೋತ್ತರ ಪರೀಕ್ಷೆಗಾಗಿ ಆಸ್ಪತ್ರೆಗೆ ರವಾನಿಸಿದರು. ಕುಟುಂಬಸ್ಥರ ಆಕ್ರಂದನ ಮುಗಿಲು ಮುಟ್ಟಿದ್ದು, ತಮ್ಮ ಮಗನನ್ನೇ ನಂಬಿದ್ದ ಸ್ನೇಹಿತರು ಹೀಗೆ ಬರ್ಬರ ಹತ್ಯೆ ಮಾಡಬಹುದು ಎಂಬುದು ಅವರ ಪಾಲಿಗೆ ಅಘಾತ ತಂದಿದೆ.

ಪೊಲೀಸರ ತನಿಖೆ ಮುಂದುವರಿದಿದೆ

ಪೊಲೀಸರು ಸದ್ಯ ಸಿಸಿಟಿವಿ ದೃಶ್ಯಾವಳಿಗಳನ್ನು ಆಧರಿಸಿ ಆರೋಪಿಗಳ ಪತ್ತೆ ಕಾರ್ಯದಲ್ಲಿ ತೊಡಗಿದ್ದಾರೆ. ಕೊಲೆಗೆ ನಿಖರ ಕಾರಣ ಇನ್ನೂ ತಿಳಿದುಬಂದಿಲ್ಲ, ಆದರೆ ಸ್ನೇಹಿತರೆ ಈ ಕೃತ್ಯ ಎಸಗಿರುವ ಶಂಕೆ ಬಲವಾಗಿದ್ದು, ತನಿಖೆಯ ನಂತರ ಸತ್ಯ ಹೊರಬರಲಿದೆ.