ಅಂತರರಾಷ್ಟ್ರೀಯ ಬೂಕರ್ ಪುರಸ್ಕೃತ “ಎದೆಯ ಹಣತೆ” ಕೃತಿಗೆ ಮತ್ತೊಂದು ಹೆಗ್ಗಳಿಕೆ
ರಾಯಚೂರು, ಜುಲೈ 30: ದೇವದುರ್ಗ ತಾಲೂಕಿನ ಪವಿತ್ರ ಗಬ್ಬೂರಿನ ಮಹಾಶೈವ ಧರ್ಮಪೀಠವು 2025ನೇ ಸಾಲಿನ “ಶ್ರೀ ಕುಮಾರಸ್ವಾಮಿ ಸಾಹಿತ್ಯ ರತ್ನ ಪ್ರಶಸ್ತಿ”ಗೆ ಪ್ರಸಿದ್ಧ ಸಾಹಿತಿ ಬಾನು ಮುಸ್ತಾಕ್ ಅವರನ್ನು ಆಯ್ಕೆ ಮಾಡಿದೆ. ಹಾಸನದ ಅವರ ನಿವಾಸದಲ್ಲಿ ಧರ್ಮಪೀಠದ ಸಮಿತಿಯ ಪದಾಧಿಕಾರಿಗಳು ಭೇಟಿ ನೀಡಿ ಅಧಿಕೃತ ಆಹ್ವಾನ ಪತ್ರಿಕೆ ನೀಡಿದರು.
ಅಹ್ವಾನ ಸ್ವೀಕರಿಸಿದ ಬಾನು ಮುಸ್ತಾಕ್ ಅವರು, “ಗಬ್ಬೂರ ಧರ್ಮಪೀಠದ ಈ ಗೌರವ ನನಗೆ ಹೊಸ ಶಕ್ತಿಯೊಂದು ತುಂಬಿದಂತಾಗಿದೆ. ಇದು ಕಲ್ಯಾಣ ಕರ್ನಾಟಕದ ಶರಣ ಪರಂಪರೆ ಹಾಗೂ ಸಾಹಿತ್ಯ ಚಿಂತನೆಗಳತ್ತ ನನ್ನನ್ನು ಇನ್ನಷ್ಟು ಆಳವಾಗಿ ಸೆಳೆಯಲಿದೆ,” ಎಂದು ಸಂತೋಷ ವ್ಯಕ್ತಪಡಿಸಿದರು.
ಬಾನು ಮುಸ್ತಾಕ್ ಅವರು ತಮ್ಮ “ಎದೆಯ ಹಣತೆ” ಕೃತಿಗೆ 2025ನೇ ಸಾಲಿನಲ್ಲಿ ಅಂತರರಾಷ್ಟ್ರೀಯ ಬೂಕರ್ ಪ್ರಶಸ್ತಿ ಗಳಿಸಿದ್ದು, ಕನ್ನಡ ಸಾಹಿತ್ಯ ಲೋಕಕ್ಕೆ ಜಾಗತಿಕ ಗುರುತನ್ನು ತಂದಿದ್ದಾರೆ ಎಂದು ಸಾಂಸ್ಕೃತಿಕ ಸಮಿತಿಯ ಅಧ್ಯಕ್ಷ ಡಾ. ಎನ್.ಹೆಚ್. ಪೂಜಾರ ಅವರು ಹೆಮ್ಮೆ ವ್ಯಕ್ತಪಡಿಸಿದರು.
ಈ ಪ್ರಶಸ್ತಿ ಪ್ರದಾನ ಸಮಾರಂಭವನ್ನು ಆಗಸ್ಟ್ 9ರಂದು ನೂಲು ಹುಣ್ಣಿಮೆಯ ಅಂಗವಾಗಿ ಗಬ್ಬೂರ ಧರ್ಮಪೀಠದಲ್ಲಿ ಬೆಳಗ್ಗೆ 11 ಗಂಟೆಗೆ ಆಯೋಜಿಸಲಾಗಿದೆ. ಶ್ರೀ ಕುಮಾರಸ್ವಾಮಿಗಳ ಜನ್ಮದಿನದ ಪ್ರಯುಕ್ತ ಆಯೋಜನೆಯಾಗುತ್ತಿರುವ ಈ ಕಾರ್ಯಕ್ರಮದಲ್ಲಿ ಪ್ರಶಸ್ತಿ ಪ್ರದಾನವೂ ನೆರವೇರಲಿದೆ ಎಂದು ಸಮಿತಿಯ ಕಾರ್ಯದರ್ಶಿ ಬಸವರಾಜ ಸಿನ್ನೂರ ಅವರು ತಿಳಿಸಿದ್ದಾರೆ.